其實男禮究竟租好定訂造好呢?
我地走訪左不同租及訂造的男禮／洋服店之後，有以下小小感受～所以又歸納出訂造或租男禮的各種不同及要點俾大家參考下 ～
心得１：先考慮全日想要幾多套男禮，因為會影響你的選擇。例如：
- 如果想要２套，考慮早上接新娘個套或會用埋來敬酒用。咁就要考慮你想要的顔色是否兩種場合都適用～紅色／藍色？有些長輩或會介意婚宴上用藍色的。
- 比較價錢上亦會因件數而有所不同。理論上租得愈多，平均一套愈平。
心得２：想一套多用要考慮款式。例如：
- 格仔款感覺輕鬆一點。早上接新娘沒問題，如果夜晚著格仔款可能會唔夠隆重，plus 分分鐘賓客都有機會著格仔西裝，可能會撞衫，或顯得新郎唔突出～
心得３：想用盡禮服? 善用配件。重覆著西裝，不同配件感覺又會有分別。例如：
- 同一套西裝，可以考慮早上不配馬甲，感覺較輕鬆；夜晚加返件馬甲即刻grand 哂~
- 早上整套有色西裝配一套著，晚上有色西裝外套配返黑褲著
心得４：我大約計過，度身訂做一式３件(不特別料)，同男禮店租一套價錢差不遠～但你要考慮男禮店租的是用靚正式西裝料，訂做一套(如果差不多價錢計)布料質素會不同。
心得５：要睇新郎身型，如果係標準一般尺寸，男禮店尺碼一般都齊，沒問題。如果唔係既，可能手長腳長，特別高既，就要考慮訂做喇～
心得６：考慮訂做西裝之後是否著得返。你可以請店舖幫你做可拆式活動領，著完拆走禮服領就可以平時著。但如果有色西裝，除非你Husband-to-be 係好chic，唔係之後真係無場合著到。（我地有諗過去飲著唔著到丫？但即刻諗到咁咪分分鐘同新郎哥好似，即係ｂｙｅｂｙｅ左～）
心得７：租男禮有個好處，同我地新娘一樣，可以轉款。我地自己都成日心大心細，所以租衫就靈活性高點。另外，就係佢會有齊所有配件（腰封，呔，袋巾），仲有專業既幫你襯好哂～
心得８：同之前一樣，我大概計過，男禮店租埋爸爸西裝(會比租新郎既平架)，同幫爸爸s 訂做一套差不多錢，租可能會輕輕平一點點，而男禮店一樣包配飾既。所以，自己考慮下爸爸平時會唔會有機會著返套西裝再選擇～
心得９：如果需要自備西裝prewedding，不如真係訂做一套。著兩次絕對抵返條數呀～記得做埋活動禮服領，咁就ＰＷ著得，big day又著得喇～～
心得１０：如果你的Husband-to-be 係標準身型，買衫通常都啱size既 ，建議你唔好心急，去行一行西裝店，睇下現貨有無啱，搵到啱身就發達喇～平好多架～
(圖片取自網上)
心得１１：如果夜間想著隆重一點的燕尾服，除了有機會著返既朋友外，真係建議不如租。因為１）訂造一套燕尾服 跟平時西裝/普通禮服款價錢不一樣，會稍高。２）燕尾服是隆重的服飾，不像一般西裝/禮服上用料可以選擇輕鬆一點，用料不夠好真係會差好遠的。３）除左做新郎或有些朋友會出席正式宴會，著返機會真的不大，做一套又很難再放售，結果放在家中要keep要打理。
心得１２：一般訂做去老牌洋服店(不特別料)價格會比較低 $1100+，但又有可能師傅唔係做開後生款。一係就做到爸爸款咁闊闊既，一係就做到登台咁款，所以要揀洋服店既最好搵有人試過／有版睇既～
心得１３：如果去西服店(不特別料)價格大概$2000+ ，其實大部份都係返上大陸做的，少部份價格再高一點可能係本地／韓國做。雖然價格高一點，不過肯定做到新潮一點及禮服款，多數有好多版睇，可以揀啱照做。
source from wow.esdlife.com/space.php?uid=73070&do=blog&id=324811
