成在MUA，敗也在MUA! MUA注意事項及心得

我相信每個B2B都會卡住係MUA呢度，因為MUA可以話係BIG DAY既靈魂人物，所謂成在MUA，敗也在MUA，如果MUA化得唔好，新娘子分分鐘成世都會比人笑，成為茶餘飯後既話題，到時喊都冇用。所以點都要花多D時間，認真D考慮MUA呢個Item. 不過講到底，其實有邊個B2B唔貪靚架，緊係想自己係BIG  DAY 果日成為眾人既焦點啦!!!

因為我唔識化妝 (係丫，真係唔識架，唔好笑我，朋友教極都唔識，佢地反晒白眼。可能由細到大做開朋友既Barbie，要化妝實有人會幫我) 所以我亂咁係FB周圍搵下，覺得岩心水就問人拎rate card，好似儲明星閃卡咁。睇左幾十個MUA既相之後，真心覺得個個新娘子都咁靚女，好似冇咩參考價值(加上唔識睇好定唔好)所以我放棄睇樣，主要睇髮型，因為化得人地靚唔代表化係自己面度都靚，每個人既面部輪廓，優點缺點都唔同，真係要試過先知.

開頭搵MUA個陣，問親個個都過萬，以為係正常市價 (不過不得不讚自己好有眼光)，不過就嚇到我鼻哥窿都冇肉囉，慢慢發覺原來MUA價錢既Range好大，我問過最貴既$17000+，最平可以$5000左右 (當然有更加貴或平)，所謂貴唔一定好，平唔一定差，我睇過有D平平地既MUA都唔錯架。除左睇價錢，同Photog一樣，如果MUA態度差，就算識得化到我變香港小姐都冇用，所以試妝除左試技術之外，不妨同MUA傾多幾句了解下佢既為人，當然對方有可能會扮NICE啦，但點都好過唔扮既.

其實我有兩個好心儀既MUA，但一早已經冇期同埋價錢Out bud，所以唯有死心去整理MUA rate card，List左個表出黎做比較。最後篩淨10個人左右，諗左好耐就決定左去試妝。

拎完Rate Card，除左睇價錢，仲要注意/問清楚以下問題︰

1. Package 包幾多個鐘，由幾點至幾點?

我問過有D全日Package，中間有段時間MUA會離開

2. 早費、OT費同的士費點計

基本上一定要比，因為好早就要化妝，所以要計一計以免最後超出自己預算

的士費最好講清楚實報實銷，Zaza有聽過有個MUA住好近新娘出門既酒店，收左一口價$500的士費…

3. 有D MUA會要求偏遠地區不分時段另收的士費，要留意自己出門/婚宴地點是否屬於偏遠地區
4. MUA會否提供頭飾/髮片，洗唔洗收租借費

未必個個新娘都會自己買頭飾，所以多數MUA都會有一定數量既頭飾比新娘用。但係晚宴個陣，通常未送完客，MUA已經走，應該還唔切頭飾，所以要問下點處理

5. 會唔會提供鮮花頭飾

雖然多數買花球都會有送頭花，但多問無妨。有D MUA會提供頭花/代購

6. 新郎化妝

我唔要求化到Woody變宋仲基，但至少幫佢Gel個頭先黎接我

有D MUA係會收返$300左右執執個男人樣，亦都有D唔收錢

7. 姊妹/媽媽化妝

因為我希望幫我化妝既MUA可以幫我處理埋，所以一併問埋價錢，以便自己參考(所以個價錢係跟新娘Package)

試妝當日化妝師好細心幫我清潔面部同敷返個mask，期間佢不斷了解我既喜惡。我對眼好麻煩，大細不一之餘仲好敏感，所以陪我試妝既姊妹第一句就係同化妝師講要小心我對眼，一化就會標眼水，再防水既眼線、mascara 都會即刻溶。事實證明，專業的確係專業，全程對眼好乖冇標眼水，化妝師好細心不停幫我調整對眼，順帶一提，化妝師係免費Upgrade用高清噴槍架! 就係咁我快快樂樂地Confirm左佢啦，佢仲建議我唔洗Join全日Package，根據我需要提議我Join左早+晚10小時Package ，雖然係早+晚，但佢話1點半左右會去到教堂等我，等我Confirm埋教堂再同佢夾時間。其實唔Join全日我有少少不安，我話我怕自己爆喊溶妝，又怕佢另外接Job照顧唔到我，佢聽完我咁講就話全日已經留左比我，中間個段時間係唔需要佢，佢係去食飯同休息，無謂晒錢Join全日，佢仲話會放低補妝既用品比我以便不時之需，如果到最後真係有需要，我可以揀返全日Package。

臨走前，佢仲同我講Big Day會幫我著衫，因為佢唔放心交比其他人幫我。媽啊~我即時安全感爆升. 

呢張係ZAZA果日試妝既相, 第一次用真面目見人,好怕醜呀!!

以下係取自MUA 既Facebook  (如果你係相中人, 又唔想係呢個BLOG出現既話, 請通知我)：

有時候太多選擇唔係一件好事，我相信好多B2B同我一樣都會搵好多MUA資料，睇到心大心細，唔知邊個好，以下係我既小小揀MUA&試妝心得 (純粹個人意見) ︰

1. 定Budget，睇價錢

為自己訂立Budget，當見到岩心水既MUA但太超支就篩走佢等自己冇得揀，可以避免自己嚴重支超。(日後仲有好多野超支)，同時令自己試完妝唔會受價錢而影響決定 (例如試左兩個MUA，一個好貴但好靚，另一個平D但化得幾好，十五十六唔點算好)

*但如果你真係好鍾意咁就唔洗諗其他MUA啦，直接試妝confirm

2. 做功課

篩走Out Budget既MUA後，再細心睇下MUA既相，排下鍾意既先後次序，試妝可以按呢個次序考慮

3. 試妝次數

選擇有好多，總不能試完一個又一個，畢竟試妝都要比錢，分分鐘試下試下，都洗左幾千蚊。除非真係幾次都慘不忍睹，否則揀兩三個試就夠啦。當然最好一Take搞掂~

4. 搵兩三個朋友陪試妝

始終Big Day既妝係比人睇，唔係比自己睇，所以搵兩三個朋友睇下化成點比意見最實際。

P.S.千萬唔好搵自己男朋友去， 因為男朋友一定會話你好靚，其實係佢驚左答你唔靚，要再花幾粒鐘陪你試多一次妝，咁佢就慘慘豬啦. 

5. 同MUA溝通

試妝前，搵下自己鍾意既妝容&髮型比MUA睇，同時了解下自己鍾意D咩同唔鍾意D咩，直接話比MUA知，等MUA可以了解你既喜好

6. 帶相機同電話影相

因為我本身唔化妝，出街咩都唔搽，所以MUA化完我係睇唔慣，覺得有D濃妝豔抹。MUA用我電話多角度影相比我睇，再用相機(普通數碼相機)幫我影相，真係睇得出3者有分別，過左相機之後自然好多，覺得自己靚女左(請容許我自戀下)，經兩位姊妹同意就confirm埋XD

P.S.1化得淡，影相過鏡就會好白，但肉眼睇就自然D，化得濃，影相過鏡會自然，但肉眼睇可能會誇，睇下點平衡兩者

P.S.2 雖然你地未必睇到，但在此特別感謝兩個好姊妹陪左我3個鐘

就係咁，我KO左惱人既MUA，可以開始慢吞吞地踏上尋找The One的故事. (另外真係好多謝你肯睇到呢到，哈哈)

source from wow.esdlife.com/space.php?uid=99414&do=blog&id=318040